आष्टी उपसा योजनेचं उद्घाटन मुख्यमंत्री देवेंद्र फडणवीस (Devendra Fadnavis) यांच्या हस्ते करण्यात आलं. यावेळी त्यांनी जाहीर सभेत मोठी घोषणा केली.
बीड : गोदावरी मराठवाडा पाटबंधारे विकास महामंडळाच्या कृष्णा मराठवाडा सिंचन प्रकल्पांतर्गत, आष्टी उपसा सिंचन योजना क्रमांक 3 शिंपोरा ते खुंटेफळ पाईपलाईनचं उद्घाटन मुख्यमंत्री देवेंद्र फडणवीस यांच्या हस्ते करण्यात आलं. बीड जिल्ह्यातील आष्टी तालुक्यातील खुंटेफळ येथे या कार्यक्रमाचं आयोजन करण्यात आलं होतं.
बाधित शेतकऱ्यांना जमिनीचा मोबदला दिला : मुख्यमंत्री देवेंद्र फडणवीस यांच्या हस्ते रिमोट कंट्रोलनं जलवाहिनी कामाचा शुभारंभ करण्यात आला. मुख्यमंत्री देवेंद्र फडणवीस यांच्या हस्ते या प्रकल्पाचे बाधित शेतकरी देविदास जयवंत थोरवे, महादेव भाकचंद थोरवे, रामा दशरथ थोरवे, खुंटेफळ, विठोबा सखाराम काळे बाळेवाडी, आसाराम विठ्ठल पठारे, बाळेवाडी यांना जमिनीचा मोबदला धनादेशाद्वारे प्रदान करण्यात आला. यावेळी बीड जिल्हा संपर्क मंत्री पंकजा मुंडे मंत्री, जलसंपदा मंत्री राधाकृष्ण विखे पाटील यांच्यासह दीपक कपूर, अतिरिक्त प्रधान सचिव जलसंपदा विभाग, माजी मंत्री आमदार सुरेश धस, खासदार बजरंग सोनवणे, आमदार प्रकाश सोळुंके, आमदार नमिता मुंदडा, आमदार विजयसिंह पंडित, संदीप क्षीरसागर आदी उपस्थित होते.
